Toy Datonko

No daytoy kuma ket sabong
Napno't banglo agayumuom
Isu't innak yarkos
Pagdalanan ket muymuyong.

No daytoy koma ket bituen
Makapurar iti sileng,
Burarek nga ububonen,
Nga ikuentas kenka, Neneng.

Ikutam man wenno saan,
Toy pusok, bukodmo kukuam,
Patgem man wenno ranggasam
Kayawmo inggana't patay.

Uray pay no tutuokem,
Uray pay no rabrabakem,
Toy pusok kukuam laeng
Kayawmo inggana't tanem.